Fretilin no Independénsia Nasionál

Historia da Fretilin

FRETILIN NO INDEPENDÉNSIA NASIONÁL

Romeo Verdial

Textu Rezumu Kona-ba Istória Luta FRETILIN Nian

KOMISSAUN POLITIKA DISTRITU BOBONARO

Maliana, Juñu 2014

 I. Introdusaun

 Akontesementu revolusaun kravos iha loron 25 fulan Abril tinan 1974, ne’ebé lidera husi Jeneral António Espinola iha Lisboa - Portugal, hodi hatún ditadura Salezar Caetano, mak loke demokrásia no fó biban ba provínsia ultramarina sira, inklui Timor Portugués hodi bele define nia vida rasik. Fenomena polítika iha Timor komesa iha mudansa ne’ebé koñese ho espresaun slogan “Liberdade”. Matenek sira hahú organiza malu ho ida-idak nia grupu diskusaun, koalia kona-ba futuru Timor Portugés nian. Iha tinan 1974 – 1975 mosu partidu polítiku lima (5) ne’ebé mai ho konseitu no ideolojia diferente, úniku Fretilin de’it mak hakarak liberta povu maubere imediata husi dominiu koloniálizmu, ho motto/pról “Mate ka Moris Ukun Rasik-án”. Parte UDT nian hakarak husu autonomia ba Portugal, Apodeti husu integrasaun ba Indonesia, inklui partidu kiik hanesan KOTA husu Federasaun ba Australia, no Trabalhista ne’ebé nia objetivu la klaru. Diverjensia ne’e dilema povu maubere atu lao loos ba ne’ebé?. Portugal nu’udar kolonizadór lakohi halo deskolonizasaun, gera fría entre bloku leste ho oeste mós lao hela iha mundu, impaktu Jeo-Polítika, inklui Indonesia rasik iha interesse territorial kona-ba rekursu mina-rai iha Tasi Timor. Mosu gera sivíl entre Timor oan, ikus mai Fretilin konsege halo proklamasaun independénsia unilateral, no partidu haat seluk halai tama ba Indonesia assina integrasaun mak fó kbiit ba Indonesia halo invade mai Timor-Leste. Fretilin lori povu retira ba foho leten hodi reziste no enfrenta to’o baze apoiu rahun. Liu-husi esforsu oi-oin, kria mudansa ba estratéjia polítika rezisténsia hodi tempu tinan 24 nia laran, konsege konkista mehi ba independénsia liu-husi prosesu Referendu ne’ebé organiza husi misaun UNAMET, Nasoes Unidas nian iha tinan 1999.

II. Prezensa Fretilin

Husi rezultadu Revolusaun kravos iha Portugal, fó liberdade ba rai koloniál sira (free of choice). Iha Timor Portugés, hahú mosu movimentu anti-koloniálista husi grupu nasionalista Timor-oan sira hanesan Nicolao Lobato, Mari Alkatiri, José Ramos Horta, Justino Mota no Borja da Costa, ema lubun oan ne’e komesa túr hamutuk ho hanoin ida, oinsá bele liberta povu husi dominiu koloniálizmu durante tinan 450. Momentu ne’ebé ita nia rain sei mukit tebes kona-ba koñesementu siénsia no teknolojia, maibé ho esforsu tomak, mak iha loron 20 fulan Maiu tinan 1974, grupu nasionalista ne’e forma Assosiação Social Democrata Timorense - ASDT. Liu tiha fulan haat (4), aserta ba loron 11 fulan Setembru tinan 1974 halo dezulusaun ba ASDT no kriasaun Frente Revolucionária do Timor-Leste Independente – FRETILIN, ho razaun tanba haree ba konotasaun assosiasaun la fó kbiit atu halo movimentu ba reuni Timor oan sira, tantu dalan di’ak liu mak harii Frente ida hodi hasoru koloniálizmu ba atinji objetivu fundamentu mak Liberta Pátria & Liberta Povu. Fretilin iha tempu ne’ebé lidera husi Fransisco Xavier do Amaral hanesan primeiru 10 Prezidente Fretilin.

III. Konseitu Maubere

Fretilin husi inísiu sempre opta lian maubere nu’udar konseitu polítiku sosío-antropolojiku hodi identifika povu tomak. Maubere mai husi ema nia naran iha fatin ne’ebé kiak liu iha ita nia rain, koloniálista sira uza lian maubere nu’udar simblú ba hamoe ema eh hatun ema nia dignidade. Maubere reprezenta moe no mós komplexu kulpa ba Timor oan ne’ebé asimiladu (simu kultura kolonia nia). Prezensa Fretilin foti hikas naran maubere ne’ebé ema sama ona ba rai, hodi fó sentidu konseitu seluk ba lia fuan ne’e, mak povu ne’ebé áswa’in no orgullu iha nia nasaun rasik. Maubere sai simblú ba Timor hodi haketak án husi rai seluk nia ukun, signifika domin klean ba ideal liberdade, justisa no korajen povu nian hodi luta hasoru esplorasaun no okupasaun husi rai liur. Maubere mak povu k’solok wa’in ne’ebé Fretilin identifika no kore husi dominiu koloniálizmu no afirma ba mundu nu’udar nasaun ne’ebé soberanu, pás no dezemvolvimentu.

IV. Ezisténsia FALINTIL

 Relasiona ho desizaun União Democratica Timoense - UDT Iha Marsu 1975, hodi hakotu kolegasaun ho FRETILIN, mak iha loron 11 fulan Agostu tinan 1975 UDT halo asaun armada hasoru lideransa no delegadu Fretilin iha Territoriu tomak, ne’ebé koñese ho golpe 11 de Agostu. Okaziaun ne’ebá, lideransa Fretilin rekua ba foho Balibar hodi liu-ba Aisirimou – Aileu. Iha 15 de Agostu lideransa Fretilin deklara insureisaun jerál armada, hodi forma forsa ida sai nu’udar liman kro’at FRETILIN nian, hodi defende auto-determinasaun ba independénsia Timor Leste, konseitu Forças Armadas da Libertação Nacional de Timor-Leste ne’e funda husi líder Comite Central FRETILIN - CCF nian. Terminologia ne’e habadak husi kamarada Mari Alkatiri hanaran FALINTIL. CCF organiza asaun dahuluk iha loron 17 fulan Agostu 1975, hodi konvensa Sarjentu (Tropa) Timor oan iha 1a Kompaña Aileu no konsege prende Armajen (Material da Guera) no tuir kedan Kompaña sira iha territóriu tomak. CCF indijita kamarada Rogerio Tiago Lobato hanesan komandante Falintil, iha loron 20 fulan Maiu tinan 1975 Falintil dezempeña nia funsaun hodi halo kontra golpe hasoru UDT iha territóriu tomak.

V. Proklamasaun Independénsia

Depois de Falintil halo kontra golpe hasoru UDT, mak UDT hamutuk ho nia aliadu Apodeti, KOTA no Trabalhista husik hela Timor, liu-ba rai fronteira no kontinua ba Indonesia. Fretilin hamutuk ho nia lima kroat Falintil halo vizilansia eh kontrola ba Timor tomak, ezeptu enklave Oe-cusse. Ho kondisaun armada ne’ebé limitadu mak iha fulan Outubru 1975 hahú mosu konfrontasaun armas iha fronteira Batugade, mak forsa Indonesia – TNI halo agresaun mai Balibo hodi oho jornalista estranjeira na’in lima (5) iha ne’ebá. Situasaun ne’e, Comite Central da Fretilin – CCF hatene ona katak Indonesia sei halo invazaun mai Timor, nune’e CCF deside hodi halo proklamasaun independénsia unilaterál iha loron 28 fulan Novembru 1975 no iha bibian ne’e hetan kedan rekoñesimentu internasionál husi páis independente 14. Dalan proklamasaun ne’e hatudu ba mundu katak Timor-Leste laos ona territóriu koloniál abandonadu ne’ebé laiha ukun-na’in, maibé sai ona nu’udar estadu ida independente no soberanu. Iha loron 30 fulan Novembru 1975, primeiru Governu RDTL nia harii, ho Fretilin nu’udar ukun-na’in no hili Fransisco Xavier do Amaral núdar primeiru presidente da Repúblika no Nicolao Lobato nu’udar Primeiru Ministru. Haree ba jeo-polítika liu-liu iha rejiaun Sudeste-Aziatiku no Pasifiku, hanesan Indonesia ho Australia ne’ebé inísiu kedan lakonkorda ho independénsia Timor-Leste nian, mak iha loron 04 fulan Dezembru tinan 1975, CCF liu husi nia estadu ne’ebé foin harii delega ema na’in tolu (kamarada Mari Alkatiri, José Manuel Ramos Horta no Rogerio Lobato) ho objetivu ba buka tulun internasionál. Iha loron 07 fulan dezembru forsa Indonesia halo invazaun mai Timor-Leste, liu husi lalehan, rai no tasi. Lideransa Fretilin hamutuk ho povu Maubere evakua ba foho leten hodi halo rezisténsia armada.

VI. Papel Fretilin iha nia rezisténsia tinan 24

Konsekuensia husi invazaun, lideransa Fretilin hamutuk ho povu husik hela sidade no rekua ba foho hodi halo rezisténsia, mak husi loron 15 de Maiu to’o 02 de Juñu tinan 1976, CCF halibur ba dahuluk iha Soibada hafoin invazaun hodi deside divizaun Militar no Administrativa ba rai tomak, fahe zona luta nia ba neen (6) hanesan; Setór Sentru Norte, Setór Sentru Sul, Setór Sentru Leste, Fronteira Norte, Fronteira Sul no Ponta Leste. Nune’e mós iha tinan 1977, CCF halibur ba daruak iha Laline/Wehale hodi define liña orientasaun boot tolu (3) ba luta nian, hanesan; Funu popular, Funu kleur no Funu ho ita nia kbiit rasik. Formulasaun estratégia iha baze apoiu kria diverjensia de ideia hamosu dezentendementu entre presidente Xavier do Amaral ho CCF iha tinan 1977. Prezidente Fransisco Xavier do Amaral husik hela nia funsaun sira hotu iha partidu laran no sai husi Fretilin, iha loron 14 fulan Setembru 1977. Atu responde no asume responsabilidade ba rezisténsia, mak iha fulan Outubru 1977, Nicolao Lobato hahú nu’dar dirijente máximu revolusaun maubere nian, ho tríplu pozisaun hanesan Prezidente Fretilin(20 prezidente), Prezidente RDTL no Komandante em Xefe das Falintil, hodi orienta no komanda funu. Antonio Carvarino (Maulear) nu’udar vise-prezidente Fretilin no mós Primeiro Ministro RDTL no Vicente Reis (Sahe) kaer pozisaun hanesan Comissario Política Nacional – CPN, hodi organiza funu. Iha loron 20 fulan maiu, diskursu ikus liu ba nasaun husi Prezidente Nicolao Lobato. Nu’udar na’in ida ba rezisténsia organizada, mak iha loron 31 fulan Dezembru 1978 Prezidente Nicolao Lobato mate iha batalla da gera husi balla forsa Indonesia nian. Apartir momentu ne’e kedas, baze apoiu ba rezisténsia rahun. Iha tinan 1979, membro CCF ne’ebé hamutuk ema na’in 68, barak liu mak mate iha funu laran, no hela na’in sanulu (10) mak moris. Husi sobrevivente na’in 10, na’in hitu (7) hela iha rai liur no na’in tolu (3) de’it mak iha rai laran. Iha tinan 1981 Xanana Gusmao ne’ebé pertensia husi sobrevivente na’in tolu iha rai laran hahú kaer lideransa Fretilin nian no komandante em xefe Falintil. Ho esforsu tomak, nia konvoka konferénsia nasionál Fretilin, hodi reorganiza no formaliza estratégia foun funu nian hodi harii Conselho Revolucionário da Resistência Nacional – CRRN. Fretilin nakfilak án ba partidu. Iha fulan Marsu 1984, halakon desizaun ne’ebé nakfilak án ba partidu, kontinua ho natureza frentista no polítika unidade nasionál. Iha fulan Dezembru tinan 1987, Fretilin dispartidariza Falintil (Falintil sai formalmente husi estrutura Fretilin nian), Xanana Gusmao assume eh kaer de’it kargu nu’udar komandante forsa nian. Inísiu fulan Dezembru tinan 1987 harii Conselho Nacional da Resistência Maubere – CNRM, orgaun ne’e derije husi komando Falintil no Comissaun Diretiva Fretilin – CDF. CNRM fahe ba komite ezekutivu luta nia ba Frente Armada, Frente Klandestina no Frente Diplomátika. Haree ba dimensaun funu nia ne’ebé naruk, mak iha tinan 1991, komissaun koordenadora Frente diplomátika nian harii iha rai liur, iha loron 20 fulan Novembru tinan 1991 forsa Indonesia kaptura Xanana Gusmao. Kamarada Mahunu hola pozisaun hodi kaer lideransa iha tempu badak to’o hetan kapturasaun iha tinan 1993. Atu halo kontinuidade luta rezisténsia armada nian, mak Konis Santana assume hikas lideransa iha fulan agostu tinan 1993 to’o nia mate iha fulan marsu tinan 1998. Tuir evolusaun polítika Fretilin nian, atu hakoak Timor oan sira husi funu maluk seluk (UDT, Apodeti, KOTA no Trabalhista), mak iha fulan Abril tinan 1998 halao konvensaun nasionál Timorense iha Peniche – Portugal hodi hari Conselho Nacional da Resistência Timorense - CNRT no aprova karta magna. Iha fulan Agostu tinan 1999 Fretilin halao konferénsia nasionál extraordinária iha Sidney – Australia hodi hili kamarada Lu-Olo nu’udar koordenadór-Jerál konsellu prezidensia Fretilin nian, Mari Alkatiri 10 vise koordenadór-Jerál, Mahuno 20 vise koordenadór-Jerál no Mauhudu Ran Kadalak nu’udar sekretáriu ba sekretáriadu polítika Fretilin nian. Esforsu hodi satan liu obstaklu no dezafiu oi-oin, durante tinan 24 nia laran, konsege lori duni naroman mai Timor-Leste, liu husi prezensa Nasoes Unidas hodi halo Referendu (konsulta popular) iha loron 30 fulan Agostu tinan 1999, nia rezultadu maioria povu maubere hakotu deskorda simu integrasaun Timor-Leste ba Indonesia. Iha fulan Outubru 1999, Nasoes Unidas hahú tau matan ba Timor-Leste, no iha tinan ne’e duni Fretilin halo restruturasaun no kamarada Lu-Olo ho Mari Alkatiri nafatin hamutuk haforsa Fretilin. Objetivu Liberta Pátria ne’ebé Fretilin mehi atinji dadaun ona, presiza nafatin esforsu hodi ba segunda luta ba Liberta Povu, mak iha loron 15 – 20 fulan Maiu tinan 2000, Fretilin halo konférensia jerál kuadrus ba dahuluk iha Dili hodi halibur reprezentante husi distritu 13 no militante sira husi rai liur, hamutuk delegadu na’in 1250. Atu hetan desizaun husi orgaun ne’ebé ás-liu, mak konvoka kongressu extraordinária dahuluk iha Dili, loron 10 – 15 fulan Jullu 2001, hodi hili kamarada Lu-Olo sai hanesan Prezidente Fretilin no kamarada Mari Alkatiri hanesan sekretáriu jerál. Nu’udar estadu independente ida presiza iha ninia konstituisaun hodi bele define nia identidade no sai baze fundamentu ba aktu sira hotu, mak iha loron 30 fulan agostu tinan 2001, Fretilin manan eleisaun ho asentu 55 husi 88 iha Asembleia Konstituinte, hodi ba hakerek konstituisaun RDTL nian. Ho konfiansa tomak ne’ebé povu maubere fó, mak Fretilin, liu-husi kamarada Lu-Olo konsege duni restaura Independénsia Timor-Leste nia, iha loron 20 fulan Maiu tinan 2002. Kamarada Lu-Olo sai hanesan líder restauradór RDTL nia.

......................Obrigadu............................

Intervensaun Fretilin iha Parlamentu Nasional, debate jeneralidade OJE 2015

Intervensaun Kamarada Mari iha debate jeneralidade OJE 2015

PARLAMENTO NACIONAL 

BANCADA PARALAMENTAR FRETILIN

DATA, 01 DEZEMBRO 2014

Deklarasaun Politika Bancada FRETILIN

INTERVENSAUN KAMARADA SEKRETARIU JERAL PARTIDU FRETILIN,

DR. MARI ALKATIRI IHA DEBATE JENERALIDADE OJE 2015

Prezidenti Parlamentu Nasionál, Exelensia Senhor Primeiru Ministru no Exelensia Membru Meja (Parlamentu Nasionál), Ilustri Deputadu I Membru governu, rona nain iha Timor Leste tomak.
Hau hakerak tiha buat ruma ona (hakerek tiha ona intervensaun pur eskrita) maibe akompaña ho detaillu, Sua Exelensia Primeiru Ministru nian, hau hanoin diak liu hau koalia improvismu deit.
Iha tinan rua nia laran ona mak, iha Parlamentu ida ne’e (Parlamentu Nasionál Timor Leste) FRETILIN ho nia postura fóun mai hatudu sentidu estadu , kultura institusional estadu , atu tau ás liu interese estadu ho interese povu nian, duke interese partidu ka grupu ida-idak nian.
Bainhira ami (FRETILIN) deside ho postura fóun ne’e atu servisu hamutuk iha konseitu ida ke ami rasik defende, akordu Esidensial Parlamentar Pontual, ami nia objetivu atu kontribui duni ba paz establidade, mais liliu ho paz establidade atu lori rai ida ne’e ba dezenvolvimentu.
Tanba ne’e , liu tinan rua ona ami akompaña ho interese boót, (ba) ejekusaun orsamentu ne’ebé ami rasik vota afavor, ami rasik aprova, ami akompaña ho interese boót para bele komprende lolos saida mak difikuldade governu ninian, atu ejekuta orsamentu ida ne’e ho kualidade. Saida mak ami hare taxa ejekusaun boót duni maibe kualidade seidauk boót hanesan taxa ejekusaun.

Tanba ne’e, Senhor Primeiru Ministru, Senhor Prezidenti
Ami mai fila - fali ohin para atu hahu debate ba orsamentu jerál 2015, esperitu ida ne’e duni atu komtribui ho vontade ida ne’e duni atu hametin tan kapasidade ita nian, para atu lori dezenvolvimentu ne’e ba oin. Kuandu hau dehan kapasidade ejekusaun governu nian, la fó kualidade ba ejekusaun ida ne’e, hau dehan mos Parlamentu Nasionál rasik, lakonsege akompaña prosesu fiskalizasaun ida para bele ajuda governu para ejekuta ho didiak orsamentu boót ke ita iha.
Hau dehan deit, Senhor Primeiru Ministru no Senhor Prezidenti, Ilustri Deputadu no membru Governu.
Orsamentu ida ke $ 1.5 / 1.6 billoens de dollars, ne’e orsamentu ida ke boót ba pupulasaun ida um millaun habitantes, hau rasik defende pontu devista ida katak, ita tenki defende kapital riska ida para atu hahu prosesu dezenvolvimentu , ita persija duni iha brani iha korazen, para atu investe iha ita nia ekonomia para atu lori dezenvolvimentu ne’e ba oin, maibe ita tenki iha kuidadu tanba ohin loron ita halo jestaun ba abondansia, osan barak mak ita hotu tenki jere, osan barak mak governu tenki jere, (tanba) jestaun da abondansia ne’e susar teb-tebes, liliu kuandu makina ida atu halo jestaun todan demais (estrutura governu ida boot demais) I lakonsege duni akompaña lideransa makina ne’e nia vontade, ne’emak ita hare dadauk, lideransa makina governu hatudu momos tiha ona katak, hakarak atinji objetivu ida ke diak hakarak duni lori dezenvolvimentu ba rai ida ne’e, dezenvolvimentu (ida) ho kualidade, maibe makina ida ne’e tomak todan demais , makina ne’e tomak la akompaña lideransa makina ida ne’e nian.
Ne’e mak ita hare dadauk biar taxa ejekusaun boót, ita hare kualidade ejekusaun laiha, ohin governu mai husu tan osan mais ou menus (billoens) $1.57 Milloens, hau bele dehan osan ne’e bele la boót, osan ne’e nesesariu duni saida mak ita persija para atu halao dezenvolvimentu ba rai ida ne’e, hau husu deit ita nia kapasidade atu ejekuta osan ne’e sae ona toó iha ne’ebé? Para ita bele dehan osan ne’e sei bele servisu diak duni ba ita nia ekonomia , hau husu deit ita atu investe iha saida? ita atu diversifika iha ekonomia , mais ita seidauk define didiak baze ekonomia ita nia mak saida? Ita dehan deit 60% populasaun moris iha iha kanpu(agrikultura), taun baze ba ekonomia pelumenus tinan 10 mai oin, baze ita nia ekonomia mak saida ? maka industria petrolifeiru ka? (iha) agrikultura pekuaria? Ne’e importante ita tenki define .
Investe iha edukasaun, investe iha saudé ne’e kapitál humanu importante tebes maibe, makina iha saudé, makina iha edukasaun konsege duni uja osan barbarak ne’e, para investimentu ne’e fó rejultadu ida ke diak, hau husu deskulpa mais hau la hare! Hau la hare ida ne’e.
Investe iha infraestrutura , importantismu, se laiha infrastrutura laiha dezenvolvimentu, ekonomia la lao, mais ejekusaun ne’ebé halo iha infraestrutura nia kualidade toó iha ne’ebé? hau hanoin ita bele servisu hamutuk nafatin para buat sira ne’e hotu, hau laos mai kritika, hau mai dehan saida mak sala, sala duni, (tanba) vontade ita nian buat ida, ita nia servisu lao oin seluk, vontade lideransa makina nian buat ida ita nia servisu lao oin seluk, ne’emak importante.
Orsamentu tinan-tinan ho objetivu klaru tebes ho diskute , husi deskursu senhor Primeiru Ministru ninian, ita hare saida mak atu atinji , klaru ita hare aloka osan sira ne’e ho objetivu saida? Klaristimu hau lakohi kontesta buat ida ne’e, hau lakohi dehan hasai osan husi fundu minarai $689 milloens mais duke rendementu sustentavel ne’e sala, hau lakohi atu koalia hanesan ne’e. Hau dehan mak ida ne’e $689 milloens ne’ebé atu investe ne’e ita iha kapasiade duni atu investe ka lae? Osan minarai, ita tenki uja osan minarai ne’e hanesan tusan ida, se ita iha tusan ida atu uja, ita tenki hatene retornu laos atu selu deit tusan ne’e, ( maibe tenki) atu iha funan para lori ita ba dezenvolvimentu, ne’emak importante.
Ne’e signifika saida? Katak liliu governu tenki iha kapasidade atu dinamiku liu iha investimentu ho ejekusaun orsamentu ho kualidade, para atu ita bele mos kumpri ho ita nia programa rasik , programa ke ita aprezenta ho objetivu ida ke ita defini ne’e ita nian hotu maibe, hau nia duvida mak nafatin ida ne’e. 2015 ita espera katak inflasaun labele liu husi 5% ou 4%, 2015 ita espera katak kresimentu ekonomiku la hatene hira? Mais 2015 saida mak atu akontese iha dezenvolvimentu umanu, ne’emos ita tenki hare, komponente dezenvolvimentu umanu, dezenvolvimentu social , iha prosesu dezenvolvimentu nasionál ita tenki fó importansia liu.
Dala barak ita dehan, povu hotu agora iha kualidiade de vida diak liu tanba elitrisidade tama kuaze uma hot-hotu, tebes duni maibe ita mos tenki iha kapasidade atu hatudu ba povu halo nusa mak nia atu uja elitrisidade ida ne’e, purque iha fatin ne’ebé deit mak ita ba, ahi (elitrisidade) lakan loron lakan kalan, ne’e signifika katak despeza ke la fó rejultadu buat ida, la lori retronu mai nasaun, ita tenki hahu komesa iha ne’e, buat kiik ke tau hamutuk sai boót, (osan) $100 ital milloens de dollars ba elitrisidade so ba (sosa) mina deit, seidauk konta buat seluk, ita investe iha agrikultura tebes duni traktores barbarak , motivadores barbarak, mais ita halo ona estuda ida para hare rejultadu ke ita investe iha agrikultura ne’e koresponde lolos, ba investimentu ida ne’ebé ita halo ona iha agrikultura ka lae? Estudu ida ne’e importante tebes ke ita atu halo, para ita bele hatene lolos sala iha ne’ebé? Los iha ne’ebé? Saida mak los ita hadia tan, saida mak sala ita kuriji , ita investe iha fórmasaun kuadrus a nivél de saudé, mais ita laiha planu para enkuadra kuadru sira ne’ebé sai husi universitariu, ita investe mos ba dezenvolvimentu capital umanu iha fatin bar-barak, maibe ema barak mai ho fórmasaun maibe la hetan enkuadramentu, ne’emak ita akompanha no ita hare dadauk, tanba ne’e ita hotu hare halo nusa atu korije.
Ita hatene mos katak, Minarai Bayu Undang nian la toó 2021 kala maran ona, toó iha ne’ebé? iha 2018 dehan ita bele iha ona $20 billoens, se la investe iha ekonomia ke bele fó retornu mai ita, iha tenpu badak tinan 10 tan osan minarai la konsege ona sustenta ita nia orsamentu, ne’e bele dehan sei provoka krize boót ida, tanba ne’e saida mak ita hot-hotu tenki halo hamutuk , ita halo nusa mak ita bele halao dezenvolvimentu ida hahu husi baze, tebes duni entaun baze ba ekonomia ne’e saida?
Ita hatene katak ita nia rai kiik, rai ke haleu ita boót, merkadu boót ba saida? Mak ita bele uja, ita labele sai deit rai ida atu sai distinu ba importa sasan, ita tenki komesa halo produsaun lao para bele mos faan sasan ba liur, exportasaun. Ne’e ministeiru ida-idak nia relatoriu iha ne’ebé? Para hatudu saida mak konsege duni halo, agrikultura saida tan mak exporta ona, Komerciu industria saida mak mak halo ona, simu husi ministeriu sira seluk atu exporta.
Tanba ne’e ami mai hanesan FRETILIN ho vontade nafatin atu koopera, mais ami hanoin katak ami nia pozisaun tenkiser kritiku , kritiku para atu hadia, kritika para atu hametin .
Entaun senhor primeiru ministru ita boót nia intervensaun furak tebes, ita boót tenki buka dalan atu implementa saida mak hatama iha intervensaun, povu tomak hein hela halo nusa mak rejultadu ne’e atu mai duni benefisia povu, povu tomak ita tun ba baze hare, nia hakarak nia agrikultura lao, povu hakarak duni iha merkadu ba nia produtu sira, ne’e realidade, povu tomak hakarak bemos, elitrisidade iha ona mais bemos seidauk toó fatin hot-hotu.
Hau laos dehan ita tenki halo politika tinan ida deit, ou tinan rua ona, mais politika klaru ona, difinisaun atu ejekuta klaru ona, halo nusa atu ejekuta Primeiru Ministru? halo nusa mak ita nia labarik sira ne’ebé lorloron ba eskola ne’e sai husi eskola ho nia ulun ida oin seluk, matenek liu, halo nusa mak tinan-tinan ita ba wisuda ita ba graduasaun, ita hare sira ne’ebé hasai kursu lisensiadu iha ne’e, lisensiadu iha ne’eba, ita bele konta ho sira hanesan kuadrus para atu halao dezenvolvimentu ba oin, halo nusa mak ita nia doutores sira bele tun ba baze ho kondisoens para atu kura ema, para atu hadook ema husi moras, halo nusa mak ita nia majistradu sira, ho tribunais , bele iha kondisoens diak liu no kapasidade diak liu bele lori justisa ne’e ba oin, halo nusa mak ita nia ingeneru no arkitetu sira labele hanesan servisu , asesores mak hatudu fali sira , servisu lolos halo nusa? Buat sira ne’e hotu mak ita hotu tenki hamutuk para atu halao ba oin.
Exelensia Senhor Prezidenti no Primeiru Ministru.
Ita agora dadauk iha kondisaun ida ke diak liu iha mundu para atu lori dezenvolvimentu ba oin, ita iha osan, ita iha paz no establidade , ita komesa hanoin katak persija konsesus nasionál para atu halo medidas estruturantes, ita komesa hanoin katak halo nusa para hadook konflitu iha ita nia rain. Kondisoens hanesan ne’e laiha rai barak iha mundu ho kondisoens hanesan ne’e, so Timor Leste iha kondisoens tomak para atu lori rai ne’e ba oin, ita nia obrigasoens atu kaer kondisoens sira ne’e, para atu hare saida kondisoens sujetivas no saida mak kondisoens objetivas, hau hanoin ita nia frakeza sei iha subjetivu, objetivamente ita iha kondisoens ona mais subjetivamente ita seidauk iha kondisoens , ne’emak halo ita adveses ita reseu tebes , se objetivamente ita nia kondisoens no subjetivamente iha kondisoens para atu aproveita kondisoens objetivas , para bele haburas tan ita ni rikusoin, susar tebes ita la hatene los dalan ida ne’ebé mak ita atu tuir.
Dalan mak ida deit, ita hotu dehan, investe iha ekonomia, mais investe iha ekonomia signifika saida? Investe hira para atu fóti hira ou lori fila hira, ne’emak importante atu hare.
Hau nia lia fuan la naruk tan ona, hau bele garante deit mak povu tomak ba senhor Primeiru Pinistru no Presidenti Parlamentu katak FRETILIN nia postura nia baze mak atu tau interese estadu nia leten, nia postura fóun nia baze mak ida ne’e. Atu tau interese estadu iha leten, FRETILIN mos labele lakon nia kapasdade kritika , labele lakon sentidu kritiku, se FRETILIN mak lakon buat ida ne’e, entun ita la hatene interese estadu mak saida loos, saida mak interese estadu.
Tanba ne’e,hau nia lia fuan mak la monu ba imi nia laran karik, hau husu deskulpa FRETILIN nia pozisaun mak ne’e, interese estadu iha leten, vida institusional estadu I kultura de estadu, mak ne’e deit.
Informasaun kompletu Kontak Media Office Bancada FRETILIN, ABA 77058111, Ono 77706552